Kagabi, sa iyong kotse

Hindi mo ako mapipigilan

Dahil aking ipagsasabi

ang ginawa mo sa akin kagabi.

Sa loob ng iyong kotse

sa gitna ng daan.

Sasabihin ko sa katabi natin ng mesa,

sasabihin ko sa gwardiya sa opisina,

ang ginawa mo sa akin kagabi.

Sa loob ng iyong kotse

sa gitna ng daan

habang umuulan

at naiipit tayo sa trapik

sa gitna ng daan

sa loob ng iyong kotse.

Aking ipagsasabi

Ang ginawa mo sa akin kagabi

Sa pulis sa kanto

Sa manininda ng balut at itlog ng pugo

Ang ginawa mo

Sumabay na ako

kasi maulan, ang sabi mo,

madadaanan naman,

kaysa ako’y magabihan,

ang sabi mo.

Hindi ako basta mananahimik.

Alam ko ang iyong ginawa.

Sasabihin ko sa lahat ng ating kakilala

Pati sa iyong anak at sa iyong asawa

kahit pa pigilin mo ako at magmakaawa ka

kasi nagkamali ka ng akala

kasi, dahil sumabay ako sa iyong kotse

akala mo’y puwede mo nang hipuan ang aking dede

Patay malisya ka pa

Pero aking ipagsasabi

Ang ginawa mo sa akin kagabi

Kahit pa hinabol mo ako kagabi

dahil nagpumilit akong lumabas ng iyong kotse

sa gitna ng daan

sa gitna ng trapik

pero sumisigaw ako

Manyak! Manyak! Layuan mo ako!

Kung akala mong doon matatapos iyon

Nagkakamali ka, dahil aking ipagsasabi

Ang ginawa mo sa akin kagabi.

Hindi mo ako mapipigilan

Dahil makakarating sa kinauukulan

ang ginawa mo sa akin kagabi

aking ipagsasabi.

Humanda ka sa aking paghihiganti.